Subsidio

Maneho di subsidio pa instancia social

Subsidio ta un instrumento di maneho cu e pais Aruba y particularmente e ministerio di Asuntonan Social tin pa atende y stimula e iniciativanan particular activo den sector social. Hunto cu e fundacionnan y organisacionnan concerni ta adresa necesidadnan social den nos sociedad y yuda crea oportunidad cu un persona por logra su maximo potencial.

Den e maneho vigente di otorgamento di subsidio na instancia particular sin meta pa crea ganashi ta enfatisa mas y mas evidencia di prestacion y di resultado a corto y largo plazo pa cu e obhetivo nan di maneho estableci.

Den e cuadro aki, ta traha conhuntamente cu e instancianan subsidia na reportahe financiero y reportahe di contenido standariza y basa ariba prestacion medibel. Resultado ta inclui un mihor bista ariba e actividadnan y servicionan otorga y e efectividad (doeltreffendheid) eficiencia (doelmatigheid) y licitud (rechtmatigheid) di esakinan en relacion cu realisacion di e puntonan di maneho acorda.

Maneho pa riba tereno social

Nos punto di salida ta basa riba e forsa di e individuo y famia y e persona ta para central den e forma di traha. E necesidadnan di e famia vulnerabel y di e grupo di meta cu ta den un situacion riscante ta e base pa provee servicio y ayudo. Esaki ta nifica cu gobierno ta haci un intervencion den e cadena di ayudo cu ta bin di famia y otro relacionnan na momento cu ayudo ta ser pidi. Investigacion, bon practica y necesidadnan di e persona den necesidad ta dicta e tipo di servicio y ayudo cu ta wordo duna. E informacion cu ta sali for di investigacion haci y e proceso di yudansa ta wordo uza pa stipula maneho dirigi riba mehoracion di servicionan cu ta pa mehora e posicion di e persona y /of grupo di meta.

Nos ta pone enfasis riba mira señalnan trempan, ayudo trempan y prevencion pa asina necesidadnan social no ta escala innecesariamente cu e posibilidad cu e ayudo por bira menos efectivo. Problema y situacionnan riscante den famia y cerca hoben ta wordo señala trempan y activamente atendi y sostene dor di gobierno y instancianan. Ta scoge formanan di traha cu ta mas tanto preventivo, interactivo y efectivo y menos curativo. Den cada fase di e proceso di socialisacion di mucha pa adulto y di adulto pa señoridad (Life Cycle Approach) lo mira cua ta e riesgonan cu famianan Arubano lo por encontra pa asina atende esakinan trempan y den forma preventivo.

Traha den cooperacion cu e Trahado Social di Scol ta importante durante e di dos fase di e proceso di socialisacion di mucha y hoben. Den e cuadro aki e cooperacion cu instancianan cu ta duna ayudo primario ta hopi importante. E instancianan aki ta es nan cu tin bista riba e diferente posibel riesgonan cu famianan y gruponan di meta ta enfrenta. Pues, instancianan di ayudo primario ta den e posicion pa por señala trempan pa por ofrece ayudo trempan. Traha den cooperacion cu ‘KIA y Reclassering’ tambe ta importante specialmente pa ‘First Offenders’ (hobennan cu a comete delito pa prome biaha) pa yuda trece nan bek y tene nan riba bon caminda pa medio di trayectonan di coaching y guia pa haya trabou y participacion positivo den comunidad

Mas desaroyo di maneho cu ta interactivo y dirigi riba implementacion y cu ta inclui participacion di gruponan di meta specifico y famianan desfaborece den e discusionnan. (Ta construi riba e forsa di e ciudadano, enfoca riba desaroyo, motivacion propio pa traha, transformacion di famianan vulnerabel y gruponan di meta pa ta mas participativo y resistente).

DAS ta introduci desde 2017 formanan innovativo di traha cu ta encera metodonan cu ta pas cu e grupo di meta y asina ta ofrece un ayudo na midi di es nan den necesidad. Metodo den cual e individuo mes y gruponan di meta ta dirigi nan propio desaroyo y ta haya miho bista riba nan propio capacidadnan pa resisti y surpasa situacionnan dificil. E forma di traha aki ta duna mas bista ariba caracteristicanan di gruponan di meta specifico y ta facilita procesonan di guia for di un strategia interdisciplinario. Asina DAS ta introduci e proyecto ‘Hobennan den Bijstand’ caminda lo uza e metodo (instrumento) ‘Self Sufficiency Matrix’. E ‘Self Sufficiency Matrix’ ta brinda e cliente di e diverso gruponan di meta y DAS mes bon bista ariba e forsa di e cliente y grupo di meta cu lo yuda nan pa logra metanan importante di bida manera empleo, educacion, bon relacionnan y otro metanan di bida.

Scroll To Top
Privacy Policy | Disclaimer | By orbitalnets