Bida & Famia
Introduccion
Seccion Bida & Famia (SBF) ta un seccion di Departamento di Asunto Social. E seccion ta consisti di un team multidisciplinario di profesionalnan cu ta brinda terapia gratuitamente na personanan cu problema psicosocial y emocional. Esun cu pidi yudansa ta haci esaki boluntariamente y no ta wordo forsa. Tur caso ta wordo trata na un manera confidencial.
SBF ta consisti di 3 subseccion.
Procedura pa haya cita
Na momento cu un cliente acudi pa yudansa na SBF, e mester presenta un carta di referencia di cas, specialista, scol of un instancia social.
Ora e caso drenta esaki ta wordo registra y e cliente na su turno lo wordo informa telefonicamente ki dia su cita pa e prome combersacion (cita di intake) lo tuma lugar.
Ora cu e cliente ta yega pa e cita di ‘intake’, e ta wordo pidi pa yena un formulario di informacion personal. Esaki ta pa acumula datonan pa metanan estadistico di Departamento di Asunto Social. E informacion personal lo ser trata na un manera anonimo y confidencial.
Intake
E prome combersacion por tin un duracion di maximo dos(2) ora. Na momento cu e cliente no por acudi na su prome cita, ta importante pa e yama y cancela e cita 24 ora prome. Si e cliente no a presenta na e prome cita y tampoco a tuma contacto den 2 siman, e caso lo cera automaticamente. Si cliente tuma contacto despues di esaki, e lo wordo poni ariba e lista di espera.
Cerca e cliente menor di edad, lo tene e prome combersacion cu e mayor/educador cu a pidi yudansa (por tin excepcion pa hobennan desde 16 aña).
Pa e trayecto di guia por cuminsa, ta necesario pa mayor(nan)/ educador(nan) cu tin e autoridad legal, duna e autorisacion por escrito pa esaki y tambe pa por tuma contacto cu instancianan envolvi si ta necesario.
Despues di e ‘intake’, e terapista lo trece e caso den un reunion di team di SBF pa conhuntamente palabra e trayecto di guia. Na momento cu e cliente bay di acuerdo cu e plan di guia, e trayecto lo inicia.
Trayecto di guia
E trayecto di guia den SBF por consisti di un total di 12 sesion. Esaki por ta menos tambe si e metanan di guia wordo logra prome. Cita por ser duna un bes pa siman of cada dos siman. E frecuencia por varia dependiendo di e intensidad di guia.
Na momento cu e trayecto di guia cuminsa, e citanan ta wordo traha conhuntamente cu e cliente. Pues ta wordo spera cu cliente no ta falta su cita. Den caso cu no ta posibel pa atende e cita, ta pidi pa e cliente cancela esaki preferiblemente 24 ora prome na number di telefon 528-1150.
