Sosten Pa Mayor
Kico ta sosten pa mayor?
Sosten pa mayor ta ayudo cu bo por haña pa cu lantamento di bo yiu. E meta ta pa yudabo como mayornan, pa bo por guia bo yiu na e miho manera y asina stimula nan pa por logra desaroya na nan maximo potencial.
Kico lantamento di mucha ta encera?
Informacion y conseho:
- Bo por haña informacion tocante con mucha ta desaroya y kico nan tin mester na diferente edad.
- Bo ta ricibi consehonan pratico pa situacionnan di tur dia, manera con por yuda bo yiu drumi miho of con pa maneha rabia.
Sosten emocional:
- Ta normal pa sinti bo mes insigur of stress tocante lantamento di mucha.
- Sosten na mayor por yudabo pa traha cu e sentimentonan aki.
- Bo por papia cu un hende cu ta compronde loke bo ta pasa aden y por duna bo conseho pa baha bo stress.
Entrenamento y curso:
- Bo por forma parti den workshop of curso tocante un topico specifico di opvoeding, manera lantamento di mucha na un manera positivo of comunicacion cu bo yiu.
- E cursonan aki ta pratico hopi biaha y ta yudabo siña habilidadnan nobo cu bo por uza na cas.
Guia di famia:
- Tin biaha tin necesidad pa ayudo mas intensivo. Un profesional riba e tereno di lantamento di mucha por bin bo cas pa duna guia.
- E por ta util si tin problema complica of si bo tin necesidad pa yudansa adicional.
Unda bo por bay?
Sosten na mayor ta bini for di diferente organisacion, manera:
Vision pedagogico
E vision pedagogico di Aruba ta consisti di 6 punto basico.
E meta ta pa tur hende na Aruba y specialmente tur mayor sera conoci cu e 6 puntonan basico pasobra lanta un mucha ta responsabilidad di nos tur.
Nos ta splica e 6 punto basico door di duna diferente ehempel pa cada punto basico.
1. Lanta bo yiu den un ambiente safe y amoroso:
– un cas sigur;
– un scol sigur cu un bon ambiente y cu e nivel escolar ta uno adecuado pa bo yiu;
– un lugar confiabel na unda bo yiu por keda despues di scol;
– un bario sigur, nechi y limpi;
– un ambiente di amor, kiermen cu bo ta duna bo yiu hopi cariño, atencion, brasa y sunchi;
– hunga hunto cu bo yiun weganan, sin wordo stroba door di telefon;
– Pa ultimo: mester ta consciente cu un mayor ta e ehempel pa su yiunan.
2. Apoyo positivo, guia y pasa tempo hunto:
– purba di ta consciente cu e manera cu abo a wordo lanta tin influencia a riba e manera cu bo ta lanta bo yiu;
– busca un balansa entre ta estricto y laga un tiki mas los; bo yiu mester haya chens pa haci cos robes; p.e. haña un punto malo na scol.
Abo lo por gui’e e momento ey sin bira rabia;
– dune compliment tur dia, pa su esfuerzo tambe;
– stimula of motiva bo yiu su talentonan aunke abo mes tin otro preferencia;
– tin comprension pa bo yiu su insiguridad, e ta un emocion di berdad na e momento ey;
– pasa tempo hunto p.e. come hunto na mesa, combersa den auto, haci wega pafo etc.
3. Sea realistico:
– cada mucha ta desaroya den su mesun tempo; abo como mayor mester ta consciente cu cada edad ta bin cu diferente punto importante kico un mucha lo por haci;
– cada hende sea ta mucha of adulto mag di haci fout, bo ta siña semper di dje;
– bo mester ta consciente cu tambe tin otro hende cu ta yuda bo yiu desaroya p.e. docente na scol, coach di deporte, lider di creche;
– abo como mayor mester tin un bon contacto cu nan pa yuda bo yiu miho;
– no lubida di ta realistico di bo mesun desaroyo como mayor, bo mester duna bo mes un chens pa siña
4. Disciplina positivo:
– sea claro na bo yiu; duna un splicacion kico por y no por;
– sea consecuente tocante cua comportacion mag y cua comportacion no mag;
– brinda bo yiu safety kiermen no zundra, grita of duna un klap pero pone consecuencia fiho cu ta fit na e edad di bo yiu;
– laga bo yiu yuda soluciona e problema dor di dun’e un escohencia entre 2 opcion;
– percura cu esun cu ta yuda educa bo yiu (pareha;welo;wela) ta riba un liña;
– semper haci cu lokual cubo ta bisa cu bo lo haci dus no keda menasa bo yiu y no haci nada;
– duna compliment bo yiu tur dia.
5. Cuida bo mes:
– come saludabel;
– drumi suficiente;
– busca un balansa entre trabou, lanta bo yiu, tempo cu famia, sali cu amigo, haci deporte etc;
– purba di tin un bon contacto cu e otro mayor siboso ta biba hunto of no hunto e comunicacion mester t’ey y ta positivo pa e bienestar di boso yiunan;
– si bo tin stress bo mester ta consciente cu esaki lo tin influencia riba e manera di reacciona, bo por papia esaki cu bo yiu uzando palabra cu ta fit na su edad.
6. Busca sosten y ayudo:
– lanta bo yiu ta un reto grandi, cada edad tin su reto nobo; bo ta haci’e cu tur bo esfuerzo y hopi amor pero tin biaha bo no sa con pa soluciona cierto cos;
– semper bo por pidi sosten, conseho of yudansa cerca bo famia, amigonan, lider di crèche, docenten of cerca un otro professional. No duda tocante pidi sosten, bo no ta un mal mama of tata si bo no sa kico pa haci na cierto momento.
Nos sa cu tur e ehempelnan ta zona conoci pero nos ta ripara cu tin biaha door di tur cos ta bay automaticamente of sin pone atencion e lantamento di nos yiunan no ta bay bon tur ora. Tambe nos sa cu tur mayor ta hopi druk y tin basta stress den bida diario. Bo trabou, e lantamento di bo yiu, bo mes un bida social, bo situacion financiero etc. Nos ta pensa pa e bienestar di nos yiunan, e ta hopi importante cu nos ta bira consciente tocante con nos kier lanta nos yiunan compara cu con nos ta lantanan.
Pa sosten of conseho semper por tuma contacto cu FPNM (5834247) of Tienda di Educacion (161 gratis)
NL_Theory of Change Parenting Support Aruba
NL_Sociale Kaart Opvoedingsondersteuning Aruba